నగదు రహిత రాష్ట్రం దిశగా అడుగులు.. రాష్ట్ర క్యాబినెట్‌లో నిర్ణయం

0
17

నగదురహిత లావాదేవీల రాష్ట్రంగా తెలంగాణను అభివృద్ధి చేయాలని రాష్ట్ర ప్రభుత్వం నిర్ణయించింది. ప్రభుత్వం వివిధ సంస్థలకు, వ్యక్తులకు ప్రతి పైసాను ఆన్‌లైన్‌లోనే చెల్లించాలని, అలాగే ప్రభుత్వానికి జరిగే చెల్లింపులను కూడా ఆన్‌లైన్‌లోనే స్వీకరించాలని రాష్ట్ర మంత్రిమండలి సమావేశంలో నిర్ణయించారని తెలిసింది. ఆర్టీసీ బస్సులలో టికెట్లు ఇచ్చేందుకు స్వైపింగ్ మిషన్లు, మొబైల్ యాప్‌లను వినియోగించాలని నిర్ణయించారు. ముఖ్యమంత్రి కే చంద్రశేఖర్‌రావు అధ్యక్షతన రాష్ట్ర క్యాబినెట్ సమావేశం శనివారం మధ్యాహ్నం సచివాలయంలో జరిగింది. నగదు రహిత విధానం అమలుచేసేందుకు టీ వ్యాలెట్‌ను రూపొందించాలని ఈ సందర్భంగా నిర్ణయించారు. ఈ మేరకు టీ వ్యాలెట్ రూపకల్పనకు, నగదు రహిత లావాదేవీల నిర్వహణకు విధివిధానాలు రూపొందించడానికి పురపాలక, పరిశ్రమలు, ఐటీ శాఖల మంత్రి కేటీఆర్ ఆధ్వర్యంలో క్యాబినెట్ సబ్ కమిటీని ఏర్పాటు చేశారు. దీనిలో సభ్యులుగా మంత్రులు ఈటల రాజేందర్, జగదీశ్‌రెడ్డి, మహేందర్‌రెడ్డి, జూపల్లి కృష్ణారావులతో పాటు ప్రత్యేక ఆహ్వానితులుగా డిప్యూటీ సీఎం మహమూద్‌అలీ ఉంటారు. అలాగే అధికారులతో టాస్క్‌ఫోర్స్ కమిటీ ఏర్పాటుకు కూడా మంత్రిమండలి ఆమోదం తెలిపిందని సమాచారం.

LEAVE A REPLY