అంగన్‌వాడీ కేంద్రాలపై సమస్యల దాడి

0
8

ఆరోగ్య లక్ష్మి పథకం కింద గర్భిణులు, బాలింతలకు నిత్యం 200 మిల్లీలీటర్ల చొప్పున పాలు, కోడిగుడ్డు, ఒకపూట భోజనాన్ని అంగన్‌వాడీలు ప్రతిరోజూ అందించాలి. కొద్ది రోజుల వరకు స్థానిక వ్యాపారుల నుంచి కేంద్రాలు పాలు కొనుగోలు చేసేవి. అయితే పాలల్లో నాణ్యత లేకపోవడం, కల్తీ అవుతుండటం తదితర కారణాలతో ఆ పాల కొనుగోళ్లను ప్రభుత్వం నిలిపి వేసింది. దీనికి బదులుగా ప్రభుత్వ రంగ సంస్థ విజయ డెయిరీ నుంచి పాలను టెట్రాప్యాక్‌ల రూపంలో సరఫరా చేయాలని నిర్ణయించింది. కానీ 20 రోజులు గడుస్తున్నా ఇంతవరకు పాల సరఫరా ఊసే లేకపోవడంతో కేవలం అన్నం, గుడ్డు మాత్రమే అందిస్తున్నారు. కొన్ని జిల్లాల్లో రెండు నెలలుగా పాల పంపిణీ లేదు. గతంలో కనీసం నీళ్లపాలయినా ఇచ్చేవారని, ఇప్పుడు అవి కూడా అందడం లేదని గర్భిణులు, బాలింతలు చెబుతున్నారు. మెదక్‌ జిల్లాలోని పలు అంగన్‌వాడీ సెంటర్లకు మూడు నెలలుగా పాలు సరఫరా కావడం లేదు. ఉమ్మడి వరంగల్, ఖమ్మం, నిజామాబాద్‌ జిల్లాల్లో పాల నాణ్యతపై మహిళలు అసంతృప్తి వ్యక్తం చేస్తున్నారు.

LEAVE A REPLY